Bandung

KBC shingwang kata na num ni gaw makam hta kri dung nna, sari rawng atsam ningja hpring ai ni rai nga na.

Yaw Shada Lam

1. Jinghpaw Wunpawng Hkalup Hpung Ginjaw a sasana magam bungli ni hta KBC a makam hkridun hte maren ap nawng daw jau ai Num ni tai na matu.
2. Sari rawng nna kasi tai kanu/num ni rai nga na matu.
3. Atsam ningja hpring ai shayi num ni rai nga na matu.

KBC Num Magam Dap kaw nna woi awn galaw ai magam bungli ni

1. Shaning shagu chyum laika ga san hti htai hpe woi galaw nga ga ai. Dai ning 2019 hta kasa laika hpe htai na matu hkyen lajang da sai.
2. KBC Num shanan mungga laika hpe mung laning mi kalang dip shapraw nga ga ai.
3. KBC Num Ningja Magazin hpe mali ning hta kalang dip shabra ya ga ai.
4. KBC ting na kanu num ni jawm hkrum zup ai sharin hpawng kaba hpe mali ning hta kalang galaw nga ga ai. Dai ning 2019 ning April 3-8, 2019 hta (13) lang na KBC Num shawa Sharin Hpawng hpe galaw la lu sai.
5. Amyu shayi zinlum magam bungli hpe ginra hpaw da nna lata hpaji sharin ya ai lam, aten kadun aten galu sharin hpawng lamang ni hpe woi galaw nga ga ai. Wenyi makam lam hpe n-gun jat ya ai hte arawn alai, nga sat nga sa lam ni hpe mung sharin ya ai. Rep chywi sharin ai lam hpe mung dingyang hkap la sharin ya nga ga ai.
6. 2019 ning kaw nna sak pang shagu hpe zinglum lakawn ai lam hpe ginwang buga ni hta mung grau tang du hkra galaw nga lu na matu sharin lamang (curriculum) hte lesson plan ni hpe woi galaw mat wa na.
7. Amyu shayi zinlum magam bungli hpe grau tang du hkra galaw sa wa lu na matu ginra nnan htawt sit, gawgap ai lam hpe masing hte mren galaw mat wa na re.
8. Ningbaw ningla sharin lamang hpe laning ni kalang galaw ga ai.
9. MBC hte matut mahkai let MBC na woi awn jasat ai sharin lamang ni hta masha dat ya let shang lawm nga ga ai.
10. Ndai ten na mungdan byin da masa hta hkan nna hpyen yen ra ai majaw, buga ginwang kawang ai sha n-ga, hpyen yen kawan katsan let kanu num ni hpe sharin achyin n-gun jaw ai lam ni hpe galaw lu ai. Hkam ja lam, hkristan arawn alai, hkristan dinghku sak hkrung lam ni hpe sharin ya lu ga ai.

KBC shangwang ting hta nga ai kanu num ni magam dap kaw nna jasat sa wa nga ai bandung hte maren wenyi makam hta su hprang rawt jat kaba wa na matu magam dap kaw nna masing ni gran let woi jasat nga ga ai raitim, buga ginra ni hta tatut magam gun nga ai ni gaw kanu num ni hte grau nna ni kahtep nga ga ai hte maren anhte a bandung ni de shadu na matu buga magam gun ni yawng hta lit nga nga ai. Num magam dap gaw num hte sha seng ai ningmu hte nre sha, hpung woi ni yawng a magam lit rai nga ai hpe myit dum let shang lawm sa wa ga law.